اسلام اباد ته نېږدې د لویدلي الوتکې ټولې سپرلۍ وژل شوي دي

ننوتل

راجسټر

چارشنبې, 28 جولای 2010 17:04

راپورونه وايي نن سهار د یو شخصي هوايي شرکت الوتکه چې له کراچۍ څڅه پاکستان ته روانه وه اسلام اباد ته نېږدي د کیناستو پر مهال د مارګلې له غرونو سره ټکرشوې ده .د پاکستان د کورنیو چارو وزیر رحمان ملک خبریالانو ته ویلي ویره ده چې په الوتکه کې به هېڅوک هم ژوندي نه وي پاتې .

د راپورونو له مخې تر اوسه پورې د الوتکې له ماتو ګوډو یوسلو دوه جسدونه ایستل شوې دي.

د ایر بلو هوايي شرکت په دې الوتکه یو سلو څلويشت مساپر او شپږ تنه د الوتکې عمله سپاره ول .

د پاکستان لومړي وزیر یوسف رضا ګیلاني ددې پېښې د څېړنې لپاره یو کمیسون ټاکلی دی ، همدارنګه نن د پاکستان د کابینې غونډه هم لغوه شوه ده .

د پاکستان حکومت په دې مناسبت یو ورځنی ماتم اعلان کړی دی .

ځینې پاکستاني چارواکو ویلي چې یو شمیر ټپیان یې هم له الوتکې څخه روغتون ته انتقال کړې دي ، خو نورو بیا د الوتکې د ټولو سپرلیو د وژل کیدو ویره څرګنده کړې ده .

د ایربلو شرکت چارواکو ویلي چې الوتکه یې بیخې جکه جوړ او الوتنې ته چمتو وه او د کومې تخنیکي ستونزې پوښتنه په کې نه بیدا کېږي .

د پاکستان د کورنیو چارو وزیر رحمان ملک ویلي چې له الوتکې د ستونزې په اړه کوم پیغام نه دی ترلاسه شوی او دا به د الوتکې پر تور بکس له څېړنې وروسته معلومه شي چې د نسکوریدو لامل یې څه و؟

د الوتکې د لویدو له کبله د مارګې په غرونو کې ځای ځای اورونه لیګدلي دي ، ځینو خلکو ویلي چې سهار وختي یې یو مسافر وړونکي الوتکه ولیده چې ډېر ټیټه الوتنه یې کوله .

د پاکستان د کورنیو چارو وزیر رحمان ملک هم ویلي چې د الوتکه یو ځل مځکې ته ډېره راښکته شوې او بیا بېرته لوړه شوې ده چې د بیا پورته کیدو لامل یې تر اوسه نه دی څرګند .

ویل کېږي چې د الوتکې په ماتو ګوډو کې تر ډېره اورونه بل ول ، او مرستندويه ډلې هم ځکه په ځند ورسیدلي او د ژغورنې کار هم ځکه ورور پر مخ تلو.،

له بله پلوه هلته چې الوتکه لویدلې سړک هم نه شته او د ژغورنې پوځي او ملکي ډلې په ورو ور رسیدلې دي .