نن د غرمې شاوخوا دوه بجې د ۲۰۱ لمبر قول اردو او د ننگرهار د هوايي ډگر تر منځ د بارگېنونو په سيمه كې د تېلو په دوو ټانكرونو بمي چاودنې وشوې.

په دغه پېښه كوم ځاني تلفات نشته، خو دواړه ټانكرونه په بشپړ ډول د اور خوراك شوي دي. ويل كېږي چې دغه د تېلو دوو ټانكرونو بهرنيو ځواكونو ته چې په هوايي ډگر كې مېشت دي، تېل لېږدول.

د ننگرهار ولايت وياند احمد ضياء عبدالزى چې له خبري رسنيو سره د پېښو په اړه د دولت له دريځ څخه غږېږي، د معلوماتو له وركولو څخه ډډه وكړه او وايي چې تر اوسه له دوى سره د نوموړې پېښې په هلكه پوره معلومات نشته.

مگر بل لوري ته د ننگرهار د امنيې سرپرست قومندان عبادالله تلوار وايي چې په دغو ټانكرونو پسې نښلېدونكي چسپكي بمونه تړل شوي وو او په دغه ځاى كې يې چاودنې رامنځته كړې.
 

ارشاد خوګیاڼی