د پاکستان د بهرنیو چارو د وزارت ویاند عبدالباسط ویلي د افغانستان د ولسمشر په هغو څرګندونو یې سره سم نه دی خلاص چې د پنجشنبې په  ورځ یې کابل کې وکړي ، نوموړي ویلي دوی په کابل کې خپل سفیر ته دنده ورکړې چې په دې اړه له افغان چارواکو نور معلومات وغواړي.

افغان ولسمشر حامد کرزي د پنجشنبې په ورځ کابل کې  خبریالانو ته وویل د ویکي لیکس وروستۍ رسوايي او اسنادو یو وار بیا دا په ډاګه کړه چې د تروریزم ځالې د افغانستان له پولو بهر دی او نړېواله ټولنه باید تروریزم هلته وځپي.

د ښاغي کرزي په وینا هیلمن دی چې ددې پټو اسنادو له رسوایۍ وروسته به  دا اسناد په غور وڅېړل شي او د تروریزم خلاف اوسنۍ جګړه به یو داسې لورې ته ورسمه کوي چې په کې د سیمې او نړۍ ثبات یقیني شي .

ښاغلي کرزي وویل دا اسناد دوی ته د پاملرنۍ وړ او مهم اسناد دي چې که ورته پام وشي وڅېړل شي او له هغې وروسته پریکړه وشي نو هم به د تروریزم جګړه یو سم لورې ته روانه کړي او هم به د زرګونو خلکو ژوند خوندي شي .

په دې وروستيو كې د"ويكي ليكس" په نامه يوې انټرنېټي پاڼې، د افغانستان د جنګ او په دې هېواد كې، د ګاوڼدېو د لاس وهنې او له مخالفينو سره يې د مرستې په هكله، څه باندې نوي زره جاسوسي اسناد ښكاره كړي دي.

کرزي وویل تر دې اسنادو د مخه هم دوی وار وار ویلي چې تروریزم د افغانستان په کلیو او بانډو کې نه دی بلکې د افغانستان له پولو بهر دی او له هغه ځایه تمویليږي ، روزل کېږي او افغانستان ته را استول کېږي .

د کرزي په وینا د دوی لویدیځ متحدین په دې خبره ښه پوه دي چې تروریزم چېرې دی او دا توان هم لري چې د افغانستان له پولو بهر د هرهګرو ځالي وزپي خو دا چې دوی ولې دا کار نه کوي دا د پوښتنې وړ خبره ده .

کرزي که څه هم تر پایه په خپلو خبرو کې د پاکستان نوم یاد نه کړ خو له خبرو یې په ډاګه څرګندېده چې د افغانستان له پولو  نه یې موخه پاکستان دی .

د ویکي لیکس له رسوايۍ وروسته چې په کې د پاکستان استخباراتي اداره د طالبانو سره مرستندویه ښودل شوي یو شمیر نورو لویدیځو هېوادنو هم پر پاکستان غږ کړی چې د تروریزم له صادرولو دې لاس واخلي.

په دې لړ کې د برتانیې صدراعظم ډیویډ کامرون هند ته د خپل سفر پر مهال وویل پاکستان باید دوه مخی سیاست پریږدي او هند او افغانستان ته د تروریستانو له استولو لاس واخلي .